Jeremia 22, 36, 45, 13 & 35

Scroll asb. ondertoe om vandag se inskrywing te sien!

4 Maart 2026

JEREMIA 22:1 AFR53

So sê die Here: Gaan af in die huis van die koning van Juda en spreek daar hierdie woord

God sê vir Jeremia om 'n velduitstappie na die huis van die koning van Juda te neem en daar 'n woord te spreek.

en sê: Hoor die woord van die Here, o koning van Juda, wat sit op die troon van Dawid; jy en jou dienaars en jou volk wat deur hierdie poorte ingaan.   JEREMIA 22:2 AFR53

Jeremia gee vir die koning en sy dienaars en die volk, God se woorde. Doen reg en geregtigheid,  leef regverdig, verlos die wat verdruk is, doen geen skade, pleeg geen geweld teenoor die weeskinders en weduwees nie, en vermy onskuldige bloed, dan sal die konings op die troon van Dawid bly sit en alles sou wonderlik wees.

So spreek die Here: Doen reg en geregtigheid, en red die beroofde uit die hand van die verdrukker; en doen geen skade, geen geweld aan vreemdeling, wees en weduwee nie, en vergiet geen onskuldige bloed in hierdie plek nie. Want as julle hierdie saak sorgvuldig doen, sal deur die poorte van hierdie huis konings ingaan wat op die troon van Dawid sit, wat op strydwaens en op perde ry, hy en sy dienaars en sy volk.   JEREMIA 22:3-4 AFR53

Maar as hulle nie na God se woorde luister nie, sal God die koning se huis in 'n puinhoop verander.

Maar as julle na hierdie woorde nie luister nie, dan sweer Ek by Myself, spreek die Here, dat hierdie huis 'n puinhoop sal word.   JEREMIA 22:5 AFR53

God sê verder dat die huis van die koning vir Hom is soos die eikebome van Basan in die Gilead distrik.

Want 'n dag is daar vir die Here van die leërskare oor al wat trots en hoog is, en oor al wat verhewe is, sodat dit verneder kan word; en oor al die hoë en verhewe seders van die Líbanon en oor al die eikebome van Basan;   JESAJA 2:12-13 AFR53

Open jou deure, o Líbanon, sodat vuur jou sederbome verteer! Huil, o sipres, omdat die seder geval het, omdat die pragtige bome verwoes is! Huil, eike van Basan, omdat die ontoeganklike woud afgekap is.   SAGARÍA 11:1-2 AFR53

Die seders van Libanon en die eikebome van Basan was albei ewe veel die gepaste simbool van heerlikheid. Hierdie was uitverkore streke in of naby die Beloofde Land. God het hierdie plekke gebruik om te wys hoe waardevol die huis van Dawid vir Hom was.

Want so sê die Here aangaande die huis van die koning van Juda: 'n Gílead is jy vir My, die top van die Líbanon. Waarlik, Ek sal jou 'n woestyn maak, stede wat nie bewoon word nie!   JEREMIA 22:6 AFR53

Maar, God het beklemtoon dat Hy nie vir hulle teen die Babiloniërs sou veg nie. In plaas daarvan sou Hy teen hulle veg en self die soldate voorberei.

En Ek sal verwoesters teen jou heilig, elkeen met sy wapens, en hulle sal jou beste seders afkap en in die vuur gooi.   JEREMIA 22:7 AFR53

---

5 Maart 2026

JEREMIA 22:8 AFR53

Dan sal baie nasies by hierdie stad verbytrek en die een aan die ander vra: Waarom het die Here so gedoen met hierdie groot stad?

Nasies wat by die stad verbytrek sal wonder waarom God die stad so erg getref het.

Die antwoord is maklik - omdat Israel God verlaat het om ander gode te aanbid.

En hulle sal sê: Omdat hulle die verbond van die Here hulle God verlaat het en voor ander gode hulle neergebuig en dié gedien het.   JEREMIA 22:9 AFR53

Hierdie vers begin ‘n oorsig van die vorige drie konings.

God verbied die volk om te huil oor die koning wat dood is (Josia), maar om wel te huil oor hom wat in ballingskap is (Sallum/Joahas), want hy sal nie terugkom na sy geboorteland nie.

Ween nie oor die dooie en beklaag hom nie; ween liewer oor hom wat heengegaan het, want hy sal nie meer terugkom nie en die land van sy geboorte nie sien nie. Want so sê die Here aangaande Sallum, die seun van Josía, die koning van Juda, wat in die plek van sy vader Josía geregeer het, wat uit hierdie plek uitgegaan het: Hy sal daar nie meer terugkom nie; want in die plek waarheen hulle hom as gevangene weggevoer het, sal hy sterwe, en hierdie land sal hy nie meer sien nie.   JEREMIA 22:10-12 AFR53

Jeremia konsentreer dan op die huidige koning Jojakim en lys al sy tekortkominge.

- Hy het sy huis met onreg gebou,

- sy mense sonder betaling laat werk,

- nie die saak van die swakke en arme behartig (soos sy pa Josia) nie,

- homself verryk ten koste van ander (soos sy grootjie Manasse), en

- mense onskuldig laat doodmaak. 

Wee hom wat sy huis bou met ongeregtigheid en sy dakkamers met onreg; wat sy naaste laat werk vir niks en hom sy loon nie gee nie; wat sê: Ek sal vir my 'n groot huis bou en ruim dakkamers — en hy bou vir hom sy vensters in; en hy oordek dit met sederhout en bestryk dit met rooiminie. Is jy 'n koning, omdat jy wedywer in sederhout? Het jou vader nie geëet en gedrink en reg en geregtigheid gedoen nie? Toe het dit goed met hom gegaan. Hy het reg verskaf aan die ellendige en behoeftige; toe het dit goed gegaan. Is dit nie My erken nie? spreek die Here. Maar jou oë en jou hart is net op jou onregverdige wins en op onskuldige bloed, om dit te vergiet, en op verdrukking en afpersing, om dit uit te voer.   JEREMIA 22:13-17 AFR53

Deur al sy tekortkominge het hy die angswekkende oordeel van God oor hom laat kom. Hy sal soos ’n donkie begrawe word - hy sal van hier weggesleep word en buite die poorte van Jerusalem weggegooi word, en niemand sal oor hom treur nie.

Daarom sê die Here so van Jójakim, die seun van Josía, koning van Juda: Hulle sal hom nie beklaag met: Ag, my broer! of — ag, suster! nie Hulle sal hom nie beklaag met: Ag, heer! of — ag, majesteit! nie. Met 'n eselsbegrafnis sal hy begrawe word — weggesleep en neergegooi ver van die poorte van Jerusalem af.   JEREMIA 22:18-19 AFR53

---

6 Maart 2026

JEREMIA 22:20 AFR53

Klim op die Líbanon en skreeu, en laat in Basan jou stem hoor, ja, skreeu van die gebergte Abárim af, want al jou minnaars is verbreek.

Die profesie wend hom tot Jerusalem en haar heersers wat bestem word vir oordeel as gevolg van hul dwase afgodery en ongeoorloofde bondgenootskappe. Om na verafgeleë plekke te kyk vir hulp – Libanon, Basan, Abarim – was dwaas en vernietigend. Geestelik gesproke is hulle soos owerspelige minnaars vir Juda en nou gaan hulle vernietig word.

God se volk het baie seën en voorspoed in hul land Israel gehad. In baie van daardie jare van voorspoed het God met hulle gepraat, maar hulle het geweier om te luister.

Ek het met jou gespreek in jou sorgelose rus, maar jy het gesê: Ek wil nie luister nie. Dit was jou weg van jou jeug af, dat jy na my stem nie geluister het nie.   JEREMIA 22:21 AFR53

Miskien sou hul gevangenskap ‘n omgewing skep waar die mense en heersers van Jerusalem weer na God sou luister en die afgode van die nasies sou verwerp.

Die wind sal al jou herders verstrooi, en jou minnaars sal in gevangenskap gaan; ja, dan sal jy beskaamd staan en in die skande kom weens al jou boosheid. Jy wat sit op die Líbanon, vasgenestel in die seders — hoe sal jy sug as weë oor jou kom, smart soos van een wat baar!   JEREMIA 22:22-23 AFR53

Gonja is kort vir Jojagin - die seun van Jojakim wat slegs drie maande regeer het en verkeerd gedoen het in die oë van God. Hy het homself oorgegee aan Nebukadneser wat hom na Babilon weggevoer het, en waar hy gesterf het.

So waar as Ek leef, spreek die Here, al was Gonja, die seun van Jójakim, koning van Juda, 'n seëlring aan my regterhand, tog sal Ek jou daar afruk, en Ek sal jou gee in die hand van hulle wat jou lewe soek en in die hand van hulle vir wie jy bang is, naamlik in die hand van Nebukadrésar, die koning van Babel, en in die hand van die Chaldeërs. En Ek sal jou wegslinger, saam met jou moeder wat jou gebaar het, na 'n ander land waar julle nie gebore is nie, en daar sal julle sterwe. Maar na die land waar hulle siel na verlang om daarin terug te kom, daarheen sal hulle nie teruggaan nie.   JEREMIA 22:24-27 AFR53

God sê hier oor Jojagin dat selfs al was hy so kosbaar soos ’n seëlring aan Sy regterhand, sou Hy hom afruk.  God noem Jojagin ’n weggooiding, ’n gebreekte kleipot, ’n man sonder troonopvolger en ’n man wat nooit in sy lewe iets sal bereik nie, want hy sal nooit regeer nie en ook nie iemand van sy nageslag nie.

Is hierdie man Gonja 'n veragte, verbryselde voorwerp, of 'n ding waar 'n mens geen behae in het nie? Waarom is hy en sy geslag weggeslinger en weggewerp in 'n land wat hulle nie ken nie?  o Land, land, land, hoor die woord van die Here! So sê die Here: Skryf hierdie man op as kinderloos, 'n man wat nie voorspoedig sal wees in sy dae nie; want dit sal niemand van sy geslag geluk om te sit op die troon van Dawid en nog oor Juda te heers nie.   JEREMIA 22:28-30 AFR53

Jeremia 22 som God se boodskap van oordeel oor die leiers en die konings, kortliks op.  In wese gaan dit oor hul selfverryking, hul gebrek aan regverdigheid en hul onvermoë om na God te luister.  Ons sien dit vandag nog in baie leiers se lewens.

---

7 Maart 2026

JEREMIA 36:1 AFR53

En in die vierde jaar van Jójakim, die seun van Josía, die koning van Juda, het van die Here hierdie woord tot Jeremia gekom:

Die vierde jaar van Jojakim was ten tye van die eerste Babiloniese inval (605 v.C.) toe Daniël en ander gevangenes na Babilon weggevoer is.

God beveel Jeremia om nie net sy profesieë te spreek nie, maar om dit ook neer te skryf. Dit moes al die profetiese woorde insluit wat hy tot op daardie stadium gegee het (van die dag af dat ek met jou gepraat het). Dit was drie en twintig jaar se boodskappe van Josia se dae tot nou toe.

Neem vir jou 'n boekrol en skrywe daarop al die woorde wat Ek met jou gespreek het oor Israel en Juda en oor al die nasies, van die dag af dat Ek met jou gespreek het, van die dae van Josía af, tot vandag toe.   JEREMIA 36:2 AFR53

God het Jeremia beveel om dit te doen sodat die boodskap meer effektief oorgedra kon word.

Dit was nog amper 20 jaar voor die finale verowering van Jerusalem, en dit was steeds moontlik om te sien hoe God Juda kon red. Maar om dit te doen, moes hulle God se woorde hoor,  elkeen van sy bose weg bekeer en as hulle dit sou doen, sou God hulle ongeregtigheid en sondes kon vergewe.

Miskien sal die huis van Juda luister na al die onheil wat Ek van plan is om hulle aan te doen, sodat hulle hul bekeer elkeen van sy verkeerde weg en Ek hulle ongeregtigheid en hulle sonde vergewe.   JEREMIA 36:3 AFR53

Barug was Jeremia se assistent en sekretaris. Die profeet het vir Barug die woorde wat God tot hom gespreek het, laat neerskryf.

En Jeremia het Barug, die seun van Nería, geroep; en Barug het op 'n boekrol geskrywe, uit die mond van Jeremia, al die woorde van die Here wat Hy met hom gespreek het.   JEREMIA 36:4 AFR53

Jeremia was verhinder – nie gevange geneem nie. Hy was waarskynlik verban uit die tempelgebied en daarom het hy vir Barug gestuur om die geskrewe woord van God aan die mense van Jerusalem by die tempel te lees.

En Jeremia het aan Barug bevel gegee en gesê: Ek is verhinder, ek kan nie gaan in die huis van die Here nie.   JEREMIA 36:5 AFR53

Die mense van Jerusalem en Juda het steeds op die vasdae tempel toe gegaan. Hierdie gewoonte was vir hulle belangrik al was hul harte baie vêr van God. Ek skat die spreekwoord - mag van die gewoonte - is hier van toepassing.

Gaan jý dan en lees uit die rol wat jy uit my mond beskrywe het, die woorde van die Here voor die ore van die volk in die huis van die Here, op die vasdag; en jy moet dit ook lees voor die ore van die hele Juda wat uit hulle stede kom.   JEREMIA 36:6 AFR53

Barug het gedoen soos Jeremia hom beveel het, en het die woorde van die boek in die tempel gelees.

En Barug, die seun van Nería, het gedoen net soos die profeet Jeremia hom beveel het deur uit die boek te lees die woorde van die Here, in die huis van die Here.   JEREMIA 36:8 AFR53

---