Engele in die Bybel - Openbaring 1 tot 3
- Regina Torre
- Jul 28
- 20 min read
Updated: Aug 19
28 Julie 2025
OPENBARING 1:1 AFR53
Die openbaring van Jesus Christus wat God Hom gegee het om aan sy diensknegte te toon wat gou moet gebeur, en wat Hy deur die sending van sy engel aan sy dienskneg Johannes te kenne gegee het,
Die laaste boek van die Bybel, Openbaring, sê dat elkeen wat hierdie boek lees geseën sal word.
Salig beteken geseënd! Lees, hoor & bewaar: Openbaring is die enigste boek in die Bybel wat sê dat as jy die drie goed doen met betrekking tot dié brief, dan sal jy geseën word!
Salig is hy wat die woorde van die profesie lees, en die wat dit hoor en bewaar wat daarin geskrywe is, want die tyd is naby. OPENBARING 1:3 AFR53
Wat vertel die eerste vers van Openbaring vir ons.
Die Openbaring - enkelvoud, een openbaring of bekendmaking.
Grieks = apokalupsis
Wie se openbaring - Jesus Christus se openbaring wat God aan Hom gegee het.
Diensknegte - Grieks, doulos = ‘n Lewenslange, vrywillige slaaf vir ‘n goeie meester. As Christene is ons vrywillige slawe van Jesus Christus ons goeie Meester.
Te toon- ‘n Ongeseëlde openbaring wat die hoorder moet verstaan. Nie geseël soos Daniel se profesieë nie. Johannes het die gebeure gesien, soos ‘n fliek wat voor hom afspeel.
Gou moet gebeur - beteken hier dat wanneer die profesie begin dan gaan als wat moet gebeur vinnig op mekaar volg.
Engel - Die engel is die tussenganger of boodskapper tussen Jesus en Johannes.
Johannes kyk terug en getuig oor wat hy gesien het. Dit wat Johannes gesien het, het hy in die brief Openbaring geskryf.
wat getuig het van die woord van God en die getuienis van Jesus Christus — alles wat hy gesien het. OPENBARING 1:2 AFR53
Openbaring 1:1 vertel ons ook wie die outeur van die boek is. Dit is nie die engel in hierdie vers nie, alhoewel hy wel 'n rol in die skryfwerk speel.
Inteendeel, God die Vader het Hom (verwysend na Jesus Christus) die boodskap gegee wat dan in die boek aan naamlose engele gegee sou word, wat dit toe aan die apostel Johannes gegee het om uiteindelik alles neer te skryf wat hy gehoor en gesien het.
Johannes het dus nie die boek geskryf nie, maar eerder meer soos 'n sekretaris opgetree wat opteken wat God self aanvanklik te sê gehad het, met Johannes se eerstepersoonservarings dwarsdeur die verhaal invoeg. Die outeurskap in volgorde is dan:
1. God die Vader (die Bron)
2. Jesus Christus (die Onderwerp)
3. Verskeie Engele deur die boek (die Boodskappers)
4. Apostel Johannes (die Skrywer)
Geniet ons ‘vinnige’ reis deur Openbaring vanuit die oogpunt van die engele!
29 Julie 2025
OPENBARING 1:20 AFR53
die verborgenheid van die sewe sterre wat jy in my regterhand gesien het, en die sewe goue kandelaars: die sewe sterre is die engele van die sewe gemeentes, en die sewe kandelaars wat jy gesien het, is die sewe gemeentes.
Die verborgenheid of ‘mystery’ van die sewe sterre en die sewe goue kandelaars word nou hier weergegee. Kom ons gaan eers terug in die hoofstuk om te sien wat Johannes beleef het.
Johannes draai om, om te sien wie met hom praat en die eerste wat hy sien toe hy omdraai is sewe goue kandelaars.
Die kandelaars word nie omskryf nie maar wanneer die Bybel van kandelaars praat word daar verwys na die menorah. Die menorah is ‘n goue kandelaar met sewe lampe en was die enigste lig in die tempel van God.
Toe draai ek my om, om te sien watter stem met my gespreek het; en toe ek my omgedraai het, sien ek sewe goue kandelaars, OPENBARING 1:12 AFR53
Vêrder sien Johannes toe Een soos die Seun van die mens, wat in Sy regterhand sewe sterre hou.
En in sy regterhand het Hy sewe sterre gehou, en 'n skerp tweesnydende swaard het uit sy mond uitgegaan, en sy aangesig was soos die son wat skyn in sy krag. OPENBARING 1:16 AFR53
Nou vir die uitleg van die sewe sterre en die sewe kandelaars wat Johannes gesien het!
Met die lankmoedige geduld van die enigste Een wat Homself die Oue van Dae kan noem, het Jesus gesien hoe Johannes verwagtend wag. As nog 'n voorbeeld van hoe die Bybel sy eie simbole interpreteer, het Jesus voortgegaan en geïnterpreteer wat daardie simbole eintlik verteenwoordig. Johannes sou nie hoef te raai nie, en ons ook nie.
Die sewe sterre was engele wat beskermend oor sewe gemeentes wat in Asië is, gewaak het.
Die sewe gemeentes was: 1. Efese, 2. Smirna, 3. Pergamus, 4. Thiatire, 5. Sardis, 6. Filadelfia en 7. Laodecea.
Ons weet reeds dat engele God se boodskappers is. In hoofstuk 2 en 3 van Openbaring sal ons sien dat engele ook bewakers en bewaarders is.
Die Psalms leer ons dat engele nie net wag hou oor ganse instellings, soos die sewe kerke wat Jesus op die punt staan om per brief aan te spreek nie, maar ook hele nasies van mense soos Israel, en ook individue soos ek en jy. Soos die Psalmis geskryf het.
want Hy sal sy engele aangaande jou bevel gee om jou te bewaar op al jou weë. PSALMS 91:11 AFR53
Ons gaan nou na elk van die sewe briewe kyk wat Johannes aan die engele van die sewe gemeentes geskryf het. Die briewe is in ‘n spesifieke orde geskryf wat begin met Efese en eindig met Laodecea.
Elke brief word in sewe gedeeltes opgedeel wat begin met ‘n omskrywing van die stad waarin elke gemeente geleë is. Jesus kies dan vir Homself ‘n titel wat van toepssing gemaak word op elke gemeente. Die gemeentes se goeie en slegte eienskappe word uitgelig met die nodige aanbevelings wat ter harte geneem moet word. Die gemeentes word dan aangemoedig om te luister en die briewe word afgesluit met sekere beloftes wat aan die oorwinnaars gemaak word.
30 Julie 2025
OPENBARING 2:1 AFR53
Skryf aan die engel van die gemeente in Éfese: Dít sê Hy wat die sewe sterre in sy regterhand hou, wat wandel tussen die sewe goue kandelaars:
Die eerste brief is geskryf aan die gemeente in Efese.
1. Naam van gemeente: Efese - beteken beminde!
Efese was ‘n belangrike hawestad in die Middelandse See, en het die westelike en oostelike uiteindes van die Romeinse Ryk verbind. Die geweldige vloei van goedere deur hierdie hawe het die stad baie ryk gemaak.
Hawens bring skepe, en skepe bring matrose en reisigers, en hulle het hierdie stad en sy baie tempels wat aan die Romeinse gode gewy was, besoek. Die grootste hiervan was die tempel van Diana wat gevul was met prostitute.
Te midde van hierdie besige stad met al sy heidense invloede kry ons ook een van die invloedrykste kerke van die eerste eeu. Paulus, Johannes en Timótheüs het deur die jare onder sy leiers getel, en die stad is prominent in die boek Handelinge en die briewe van die Apostels.
2. Jesus se titel
Jesus gebruik hier dieselfde beskrywing as in Openbaring 1 verse 13 en 16. Jesus sê hiermee dat Hy die sterre of engele of boodskappers in die palm van Sy hand vashou en dat Hy teenwoordig is in die sewe gemeentes.
3. Goeie werke
Daar is ‘n hele paar goed wat die gemeente goed gedoen het:
Verdra nie slegte mense nie.
Stel die wat hul apostels noem op die proef, en wys hul uit as leuenaars indien nodig.
Is verdraagsaam en lydsaam
Werk ter wille van Jesus se Naam en word nie moeg nie
Haat wat Jesus haat - die werke van die Nikolaiete.
4. Slegte werke
So besig met die werke van die Koning dat daar nie tyd is vir die Koning nie.
5. Aanbevelings
Onthou die passie waarmee die gemeente begin is. Bekeer julself en doen die werke wat jul in die begin gedoen het met Jesus as die middelpunt, anders sal Jesus jul kandelaar of gemeente verwyder.
Efese wat eens een van die belangrikste hawestede van sy tyd was en een van die sewe wonders van die antieke wêreld, is vandag 9.6 km van die see af met net ruines oor wat besigtig kan word.
Die gemeente van Efese het duidelik hul eerste liefde bly verlaat en hul kandelaar is van sy plek verwyder.
6. Wie ’n oor het, laat hom hoor wat die Gees aan die gemeentes sê
Die sin word in elke brief gevind. In die eerste drie briewe is die sin voor die belofte aan die oorwinnaar. Elkeen van ons met ore moet hoor wat die Gees aan die gemeentes sê.
7. Belofte aan oorwinnaar
Die belofte wat aan die einde van elke brief kom bemoedig gelowiges. Oorwinnars sal in die ewige toekoms eet van die boom van die lewe wat in die paradys is.
31 Julie 2025
OPENBARING 2:8 AFR53
En skryf aan die engel van die gemeente in Smirna: Dít sê die eerste en die laaste, wat dood was en lewend geword het:
1. Naam van gemeente: Smirna - beteken Mirre, soos in baba Jesus se geskenke van goud, mirre en wierook.
Mirre was ‘n natuurlik boomgom van die omgewing, en ‘n belangrike bestandeel in die balsem proses. Dit word geassosieer met die dood, wat die hooftema van hierdie brief is.
Smirna, vandag Izmir, is die 3de grootste stad in Turkeie en is noord van Efese met ‘n bevolking van 2,947,000 (2018). Die stad was strategies geplaas vir handel tussen Europa en Asië met uitvoer produkte soos tabak, druiwe, vye, katoen, olywe & olyfolie.
Smirna was in Johannes se tyd net nog 'n Romeinse stad vol heidense tempels, en die grootste tempel was die een vir keiser Tiberias. Dit het hierdie stad die hart gemaak van keiseraanbidding in Klein-Asië, en as sodanig het dit 'n vroeë vervolger van Christene geword.
Onder die Romeinse Keisers het geweldige en verskriklike vervolgings plaasgevind. Die Christene is in die arenas tot vermaak van die keiser en sy volgelinge vir die leeus gevoer en hulle moes met wilde diere veg tot die dood toe.
2. Jesus se titel
Jesus adresseer elke kerk met ‘n gedeelte van Johannes se beskrywing oor Homself in hoofstuk een, wat ook hul eienskappe uitlig. Jesus weet hoe dit is om as mens te sterf, maar Hy het ook die krag om die dode te oorwin en vir ewig te lewe.
3. Goeie werke
Verdrukking hier is die Christene wat vervolg word. Om te werk moes jy aan ‘n unie behoort, en elke unie het ‘n sekere god aanbid. Deel van die aanbidding was verpligte offerhandes om jou aliansie met die gode te bewys. As jy geweier het om die gode te aanbid, was jy nie ‘n lid van die unie nie en het jy nie werk gekry nie, vandaar hul armoede. Daarom dat Jesus sê Hy ken hul werke en armoede en Hy weet van hul verdrukking.
- maar jy is ryk - hulle was beslis nie ryk aan aardse besittings nie, maar ryk in Christelike deugde en ewige besittings.
Sinagoge van Satan - Ongelowige Jode wat die Christene vervolg het.
4. Slegte werke
Geen
5. Aanbevelings
Verdrukking was vir die Christene ‘n gegewe! Beslis nie ‘n uitkyk wat enige van ons met ons gemaklike lewens vandag verstaan nie. Jesus sê vir dié gemeente dat verdrukking beslis gaan plaasvind en dat hulle nie daarvoor moet vrees nie. Jesus se aanbeveling is dat hul getrou moet wees tot die dood toe, want in die ewige lewe sal hulle die kroon van die lewe kry!
Die Romeine het nie gevangenis vir lang tydperke in hul tronke gehou nie. Tien dae klink kort genoeg om ‘n vonnis te voltrek en die gevangenes na die amfiteater te vervoer waar hulle met die wilde diere tot die dood toe geveg het.
6. Wie ’n oor het, laat hom hoor wat die Gees aan die gemeentes sê
Let op dat die belofte aan die oorwinnar weer na die sin ‘wie ‘n oor het’ gegee word.
7. Belofte aan oorwinnaar
Die belofte wat aan die einde van elke brief kom, bemoedig gelowiges. Die wat oorwin sal slegs een dood sterf, naamlik die liggaamlike dood op aarde. Die tweede dood is slegs vir diegene wat Jesus verwerp het en aan die einde van die millenium in die poel van vuur gewerp gaan word.
1 Augustus 2025
OPENBARING 2:12 AFR53
En skryf aan die engel van die gemeente in Pérgamus: Dít sê Hy wat die skerp tweesnydende swaard het:
1. Naam van gemeente: Pergamus - Pergos beteken kragtige vesting en gamos beteken huwelik, dus ‘n huwelik met ‘n magtige instelling.
Pergamus was vir baie eeue 'n magtige stad en die hoofstad van dié Romeinse provinsie. Die goewerneur van Asië het in hierdie stad gewoon en as goewerneur het hy die gesag gehad om oor lewe en dood te beslis.
Pergamus se biblioteek kon meeding met Alexandria in Egipte en het sowat 200,000 perkamentrolle gehuisves.
Die stad was die woonplek van heidense tempels, monumente en kultusse wat heidense gode aanbid het. Onder bekende besienswaardighede was die altaar van Zeus, die Griekse god van lug en donderweer asook ‘n Asklepieion mediese skool wat die middelpunt was van ‘n satanistiese kult.
2. Jesus se titel
'n Tweesnydende swaard was in antieke tye 'n algemene uitdrukking vir die swaard wat gebruik is om misdadigers tereg te stel. Jesus gebruik die omskrywing van Homself om vir die gemeente van Pergamus hul foute uit te wys en hul daarvoor aanspreeklik te hou.
3. Goeie werke
Pergamus was oorwegend ‘n plek van satanistiese aanbidding wat die stad geestelik ‘n besonderse bose plek gemaak het, veral vir Christene. Jesus gee hier erkenning aan hul goeie werke en weet dat hul vashou aan Sy Naam, en hul geloof in Jesus nie verloën nie.
Duidelik was daar nog steeds Christene wat vervolg was en tot die dood toe getrou gebly het aan Jesus, soos Antipas wat in die gedeelte as voorbeeld gebruik word.
4. Slegte werke
Onthou jy die verhaal van Bileam en sy donkie? Bileam was ‘n profeet van God, maar hy was korrup en gulsig. ‘n Persoon wat vashou aan die leer van Bileam, is ‘n persoon wat struikelblokke voor God se kinders plaas. Die ‘bileams’ van Pergamus het die kerk geleer dat daar niks verkeerd was om afgodsoffers te eet of om te hoereer in die afgodstempels nie. Dus, gelowiges wat vals leering bevorder het.
5. Aanbevelings
Twee woorde - bekeer jou! Draai weg van dit wat jy weet verkeerd is en keer terug na Jesus toe. Die swaard van Sy mond is die Woord van God en verwys hier na ‘n teregstelling of om van die kerk afgesny te word. Meer spesifiek die leiers van die kerk wat hul gemeentes vals leeringe leer.
6. Wie ’n oor het, laat hom hoor wat die Gees aan die gemeentes sê
Let op dat die belofte aan die oorwinnar weer na die sin ‘wie ‘n oor het’ gegee word.
7. Belofte aan oorwinnaar
Verborge manna - kos van God in teenstelling met kos wat aan gode geoffer is.
Wit steen in Pergamus se tyd - die Asklepieion mediese skool in Pergamus met hul satanistiese gebruike het ook genesings gedoen. Wanneer ‘n persoon wat die skool besoek het genees is van hul kwaal, het hul by die uitgang ‘n wit klip geneem, hul naam opgeskryf en die kwaal waarvan hul genees is. Dit het gedien as monumente vir die vals gode en hul genesings. Ja, die duiwel kan ook genees - daarom belangrik om te weet in wie se naam die genesing plaasvind!!
Wit steen met naam op wat niemand ken nie - soos ‘n kaartjie wat jy koop (wat net jy kan gebruik) na ‘n opvoering met beperkte toegang. Daar is net een pad na die Vader, en dit is deur Jesus!
2 Augustus 2025
OPENBARING 2:18 AFR53
En skryf aan die engel van die gemeente in Thiatíre: Dít sê die Seun van God wat oë het soos 'n vuurvlam, en sy voete is soos blink koper:
1. Naam van gemeente: Thiatire - beteken ewigdurende offerhandes.
Thiatire was ‘n belangrike stad op die handelsroete tussen Pergamus en Sardis en die stad het ook meer vakbonde gehad as enige van die ander stede in die omgewing. Elke vakbond het sy eie god aanbid en tydens die gereelde vakbond vergaderings is vleis aan die gode geoffer. Die geofferde vleis was dan ook hul ete vir die aand, gepaard met orgies wat normale praktyk was. Persone wat geweier het om deel te wees hiervan is verban uit die vakbond wat beteken het dat hulle nie kon werk en geld verdien nie.
Thiatire was ook ‘n militêre stad wat onstaan het in 300 v.C. Die stad is geleë in ‘n vallei met geen natuurlike beskerming nie, daarom was die stadsmure versterk en het hul ‘n permanente garnisoen hier gevestig, vir hul eie beskerming en vir die beskerming van die hoofstad Pergamus.
2. Jesus se titel
Die beskrywing wat Jesus uit hoofstuk een van Homself neem beklemtoon Sy oë van vuur en voete van koper. Oë wat deurboor en alles sien wat ons doen. Koper is altyd ‘n voorstelling van oordeel.
3. Goeie werke
Jesus gee weereens erkenning aan die kerk se goeie werke. Hul goeie werke het toegeneem, hulle was georganiseerd en aktief in hul diensbaarheid, lydsaamheid en liefde. Meer mense is gevoed, gehuisves, geleer, en meer mense het goeie werke ontvang. Dit wil voorkom of die mense vroom en hard gewerk het. Jesus is beslis 'n voorstander van Sy kerk wat goeie werke doen, maar goeie werke kan nie die kerk se kern missie oorheers nie, nl: evangelisasie - om siele vir Jesus te wen. Die redding van siele deur die verkondiging van die Evangelie is die uiteindelike en beste maatstaf van die kerk se gehoorsaamheid aan Jesus.
4. Slegte werke
Jesus gebruik die profetes Isebel van die Ou Testament as ‘n voorbeeld om te verduidelik wat die kerk verkeerd doen. Sy verlei die mense om te hoereer en afgodsoffers te eet. Iemand wat ‘n profeet is gee voor dat hulle van God hoor. Duidelik is die Isebel ‘n profeet met ‘n valse boodskap wat die kerk verlei, ‘n ongelowige met ‘n bose hart wat die wil van die vyand wou doen. Die groot sonde van die kerk in Thiatire is hul onvermoeë of onwilligheid om nie die valse boodskap van die profeet teen te staan nie.
5. Aanbevelings
In Pergamus het ons gelowiges gekry wat vals leeringe bevorder het, en hier in Thiatire het ons nie-gelowiges wat in beheer is van die kerk. Die kerk het hier beweeg na ‘n punt waar hul leeringe verkondig het wat duidelik deur die vyand of Satan aanvaar word.
Jesus sê nou vir dié wat nie deel is van die valse leer nie dat Hy geen ander las op hulle sal lê nie.
Jesus sluit af met ‘n verwysing na Sy tweede koms - Hou vas wat julle het, totdat Ek kom!
6. Belofte aan die oorwinnaar
Die belofte aan die oorwinnar is die volgende: 1) mag oor die nasies om hul te regeer, 2) oorwinning oor alle vyande, en 3) die môrester. Hierdie môrester is Jesus self, soos Openbaring 22:16 onthul. Jesus sal Homself aan sy kerk gee, en hulle sal ewig saam gemeenskap hê.
7. Wie ’n oor het, laat hom hoor wat die Gees aan die gemeentes sê
Hierdie frase word van hier af geplaas na die belofte aan die oorwinnaar, so die sewe gemeentes kan in twee groepe opgedeel word. Die eerste drie gemeentes en die laaste vier gemeentes. Die laaste vier het elk ‘n verwysing na Jesus se tweede koms wat kan aandui dat gedeeltes van die kerke nog vandag teenwoordig is en deel gaan uitmaak van die eindtye.
3 Augustus 2025
OPENBARING 3:1 AFR53
En skryf aan die engel van die gemeente in Sardis: Dít sê Hy wat die sewe Geeste van God en die sewe sterre het: Ek ken jou werke, dat jy die naam het dat jy leef, en jy is dood.
1. Naam van gemeente: Sardis - beteken ‘n klein groep wat oorbly of in Engels remnant.
Sardis was die hoofstad van die provinsie Lydia en word vandag Sart genoem. Die stad het bestaan uit 2 dele: ‘n Versterkte stad bo-op ‘n heuwel met onklimbare kranse en ‘n handelstad met landbouprodukte & verwante industrieë op ‘n gelyk terrein. Sardis was die dorp wat ontdek het hoe om wol te kleur.
In 546 v.C. word Sardis ingeval deur Persië. Terwyl die Persiese soldate die dorp (op die kranse) omsingel en keer dat niemand in of uit kan gaan nie, sien een van die mans hoe ‘n soldaat van Sardis se ‘helmet’ teen die krans afval. Hy sien vêrder hoe die man teen die kranse afklim en sy ‘helmet’ gaan haal, en so word die pad boontoe vir Persië gewys, en Sardis word deur hul weermag oorgeneem.
Argeologiese opgrawings is in 1910 in Sardis begin, maar die stad self is eers in 1958 opgegrawe. Al wat van die stad oorgebly het is ruines wat vandag deur toeriste besoek word.
2. Jesus se titel
Jesus gebruik die volgende omskrywings van Homself uit hoofstuk 1:
....... en van die sewe Geeste wat voor sy troon is, OPENBARING 1:4b AFR53
En in sy regterhand het Hy sewe sterre gehou, ........ OPENBARING 1: 16a AFR53
Die sewe Geeste van God is die Ou Testament se manier om die Heilige Gees te beskryf. Hoekom gebruik Jesus die titel? Heel moontlik omdat dié kerk soos baie van vandag se kerke ongemaklik is met die werkinge van die Heilige Gees, en dit is een van die groot oorsake van skeuring in ons kerke.
3. Goeie werke
Geen
4. Slegte werke
Christene word geken aan die vrugte wat hul dra. Wat is die vrugte? Dit is ons werke! As ons bekeer is en dan niks vêrder doen om vrugte te dra nie, het ons net die titel van Christen maar is vêrder dood.
5. Aanbevelings
Word wakker en gee aandag aan die mense rondom jou wat nog nie vir Jesus ken nie, veral die wat op die punt staan om te sterwe. Onthou jy nog die eerste keer toe jy die goeie boodskap gehoor en ontvang het? Bewaar die oomblik in jou hart sodat Jesus se terugkeer jou nie onverwags tref soos ‘n dief in die nag nie! Wakker volgers van Jesus sal Sy koms herken en nie onverhoeds betrap word nie!
Daar is altyd ‘n klein groep mense wat Jesus bly volg (die remnant) en hulle sal saam met Jesus in wit klere wandel! Wit is altyd ‘n simbool van verlossing.
6. Belofte aan die oorwinnaar
Die oorwinnaars is elkeen wat wedergebore is. Almal wat gered is se name is in die boek van die lewe geskryf.
7. Wie ’n oor het, laat hom hoor wat die Gees aan die gemeentes sê
Die verwysing na Jesus se tweede koms in dié brief vind ons in vers 3 - as jy nie wakker word nie, sal Ek op jou afkom soos ‘n dief.
4 Augustus 2025
OPENBARING 3:7 AFR53
En skryf aan die engel van die gemeente in Filadelfía: Dít sê die Heilige, die Waaragtige, wat die sleutel van Dawid het, wat oopmaak en niemand sluit nie, en Hy sluit en niemand maak oop nie:
1. Naam van gemeente: Filadelfia - beteken broederlike liefde.
Filadelfia is gestig omstreeks 150 v.C. deur koning Attallus van Pergamus, wie se bynaam Filadelfia was. Hierdie man was bekend vir die bewondering en liefde vir sy broer, Eumenes, en hy het hierdie stad na hom vernoem.
Die moderne naam van Filadelfia is Alasehir. Die stad was bekend as die Imperiale posroete tussen Asië en Europa, en met vrugbare vulkaniese grond en baie wingerde het die gebied bekend gestaan as ‘n wynboustreek met goeie wyn.
‘n Groot aardbewing verwoes die stad in 17 v.C. en die mense begin om buite die stad te bly omdat hulle bang is vir nog aardbewings. Hulle was veral bang dat die pilare wat die geboue ondersteun het, op hulle sou val.
2. Jesus se titel
Jesus gebruik nie hier weer ‘n beskrywing uit hoofstuk 1 nie, maar hy stel Homself voor as die Heilige en Ware God wat verwys na Jesaja 22:22.
Die gedeelte verwys na die Millenium wanneer koning Dawid onder Jesus gaan regeer. Jesus self het die sleutel van Dawid wat toon dat Jesus die hoogste gesag het.
3. Goeie werke
Hulle het God se woord bewaar en nie Sy Naam verloën nie. God maak deure oop om die werk van die evangelie en sending te bevorder en effektief te maak. Orals waar God deure vir Sy werkers oopmaak om die evangelie te verkondig, daar seën Hy hulle werk. Omdat jy die woord van my lydsaamheid bewaar het, sal Ek jou ook bewaar in die uur van beproewing wat oor die hele wêreld kom - Wegraping?
4. Slegte werke
Geen
5. Aanbevelings
Jesus sê uitdruklik dat Hy weer kom. Jesus sê hier vir die gelowiges om vas te hou aan die kroon wat hul reeds het. Die kroon is in Grieks - stephanos. Stephanos is ‘n kroon wat gewen is in die olimpiese spele. In dié geval die ewige saligheid wat gegee sal word as prys aan die opregte diensknegte van God.
6. Belofte aan die oorwinnaar
In ‘n stad met soveel aardbewings, is pilare as versterking gebruik vir die geboue. Die mense van Filadelfia was bang dat die pilare tydens ‘n aardbewing op hul sal val en daarom het hul buite die stad gewoon. Jesus sê dat gelowiges nie meer bang hoef te wees vir die pilare nie, ons sal elk ‘n pilaar kry in die tempel van God waar ons vir ewig gaan woon, en elkeen van ons sal as God se eiendom gemerk word.
7. Wie ’n oor het, laat hom hoor wat die Gees aan die gemeentes sê
Die verwysing na Jesus se tweede koms in die brief vind ons in verse 10-11.
...... sal Ek jou ook bewaar in die uur van beproewing wat oor die hele wêreld kom om die bewoners van die aarde op die proef te stel. Kyk, Ek kom gou! ...... OPENBARING 3:10-11 AFR53
5 Augustus 2025
OPENBARING 3:14 AFR53
En skryf aan die engel van die gemeente van die Laodicense: Dít sê die Amen, die getroue en waaragtige Getuie, die begin van die skepping van God:
Die sewende en laaste brief is aan die gemeente van Laodicense.
1. Naam van gemeente: Laodicense - beteken, die mense regeer in teenstelling met God wat regeer!
Die Romeine verower Laodicense in 133 v.C. en maak dit hul administratiewe en regsprekende hoofstad. Die stad was die welvarendste van al sewe stede en wyd bekend vir die geldhandel van sy bankiers. Hulle het geboer met ‘n spesiale skaap wat fyn sagte swart wol gehad het. Laodicense was ook beroemd vir hul mediese skool wat onder meer ‘n salf vir swak oë gemaak het.
Die stad is ook deur twee groot aardbewings getref. Met die tweede aardbewing wys hul hulp van Rome om die stad te herbou van die hand en herbou die stad self. Die stad wys dat hul niemand nodig het nie, hulle het genoeg geld om als self te doen.
Al wat die dorp nie gehad het nie was water wat hulle met waterkanale (aquaducks) van die naby geleë dorpe aangelê het. Die enigste probleem was dat wanneer die water in die dorp uitgekom het was dit nie warm of koud nie, maar lou!
2. Jesus se titel
Jesus gebruik die volgende beskrywings van Homself uit hoofstuk 1.
en van Jesus Christus, die getroue getuie, .......... OPENBARING 1:5a AFR53
3. Goeie werke
Geen
4. Slegte werke
Jesus ken die stad se werke, niks is verborge vir God se oë nie. Hulle is nie warm of koud nie, maar lou! Jesus sê dat hy hulle sal uitspoeg (of ‘opgooi’ is ‘n beter vertaling) omdat hulle lou is, soos ‘n mens lou water uitspoeg omdat dit so sleg is. Net genoeg godsdiens om die gewete te sus, nie om siele te red nie! Kies ‘n kant, moet nie lou wees nie!
5. Aanbevelings
Koop goud by God wat deur vuur gelouter is, sodat jy ryk word, nie met aardse besitting nie, maar met geloof in God vir die ewige lewe.
Wit klere om jou sonde te verberg, in teenstelling met die swart wol van die skape.
Salf op jou oë sodat jy jou verkeerde lewe kan sien en bekeer.
God klop aan jou deur – Gaan jy oopmaak?
6. Belofte aan die oorwinnaar
Die oorwinnaar verwys na die gelowiges, en die belofte is dat ons saam met Jesus in die toekomstige koninkryk sal wees.
7. Wie ’n oor het, laat hom hoor wat die Gees aan die gemeentes sê
Die verwysing na Jesus se tweede koms in die brief vind ons in vers 20.
Kyk, Ek staan by die deur en Ek klop. OPENBARING 3:20 AFR53
6 Augustus 2025
OPENBARING 1:19 AFR53
Skryf die dinge op wat jy gesien het, die wat is sowel as die wat gaan gebeur;
Terug in Openbaring hoofstuk 1 moes Johannes skryf wat hy gesien het (wat die engel vir hom wys), en nie wat hy gehoor het nie! Vers 1:19 gee vir ons ‘n tydlyn wat in drie dele opgedeel is.
Deel 1. Verlede tyd: Die dinge wat jy gesien het - alles wat Johannes in Hoofstuk 1 gesien het.
Deel 2. Huidige tyd: Die wat is - Hoofstuk 2 en 3 - die sewe briewe aan die sewe kerke.
Deel 3. Toekomstige tyd: Sowel as die wat gaan gebeur - Hoofstuk 4 begin met ‘na hierdie dinge’, na die sewe kerke se tydperk!
Hoofstuk 2 en 3 gee ook vir ons ‘n profetiese tydlyn van Johannes se tyd tot en met die einde. Ek sit dit kortliks uiteen.
30 tot 100 n.C. Efese - Apostoliese kerk tydperk
Die tydperk begin met die uitstorting van die Heilige Gees in die boek Handelinge en eindig met die dood van die laaste apostel Johannes wat die boek Openbaring geskryf het. Die kerk is nou vir die eerste keer sonder apostoliese leierskap, maar hulle het iets belangriker en kragtiger om die kerk te lei: die Woord van God.
54 tot 313 n.C. Smirna - Tydperk van vervolging
Die tydperk verteenwoordig ongeveer 250 jaar van vervolging. Tien Romeinse keisers, wat begin met Nero en eindig met Diocletian, het die Christene vervolg.
313 tot 600 n.C. Pérgamus - Getroude kerk
Keiser Konstantyn sien ‘n visioen op die slagveld en verklaar dat almal in die Romeinse Ryk Christene moet wees. Nou ‘trou’ die kerk met die magtige instelling van die Romeinse Ryk, en sodoende word heidense en Christen gewoontes en bygelowe vermeng.
600 tot 1517 n.C. Thiatíre - Rooms Katolieke kerk
Die Rooms Katolieke instansie oorheers die kerk en is die Isebel van hierdie tydperk wat vals leeringe in die kerk verkondig.
1517 tot 1648 n.C. Sardis - Denominasie of Reformasie kerk
Martin Luther lees in die Bybel dat nie werke nie, maar slegs geloof jou kan red. Op 31/10/1517 slaan hy sy 95 Stellings teen die Wittenberg Kerk vas, en so begin die typerk van reformasie.
1648 tot 1900 n.C. Filadelfía - Sending kerk
Vir die eerste eeu na die Reformasie kerk was daar geen sendingwerk nie. Elke groot Europese land het besluit om of die Protestante of die Katolieke kerk te volg. Elke kind wat gebore is, is gedoop in hul kerk en almal was gesien as Christene.
Vir ‘n tydperk het Filadelfia die ware, uiterlike getuieniskerk wat Jesus vir die wêreld bedoel het, weer gevestig. Die kerk het ‘n groot impak gehad deur vas te hou aan wat heilig en waar was.
As ‘n seën sê Jesus dat Hy dié kerk sal bewaar van die uur van beproewing wat die hele wêreld gaan tref.
1900 tot ? Laodicense - Afvallige kerk
Laodicense is profeties ‘n prentjie van die kerk in die eindtye. Dit is hartseer om te dink dat Jesus buite Sy eie kerke staan en klop, en die vraag moet wees of dit ‘n prentjie van ons is.
Het ons Jesus uit ons vergaderplekke uitgestoot? Word die ware Woord van God van ons preekstoele gepreek? Is ons so besig met planne maak en die aanbied van programme dat ons nie opmerk dat Jesus uit die kerk uitgeskuif is nie?
As Jesus aan die deur van jou hart klop - maak die deur oop!
Comments